Auch in diesem Jahr waren in Sarmenstorf zwei Schnitzelbankgruppen unterwegs. Die AFS hat einige ihrer Verse zur Verfügung gestellt:

Die Mäldig, die isch super eilig, – s Spital Muri schlüsst d Geburtsabteilig. – Wo in Zuekunft gebore wird, weis mer ned genau, – vermutlich im Auto, imene Stau.

Was ich ade Wahlplakat ned verstand, – warum hangids ade Strosselampe und ned a de Wand? – Es weiss es doch jedes Chind, – dass die meischte Kandidate keini Lüchte send.

Trotz Döbeli-Brüder und grosse Plakat – schaffts de Mäni ned in Grosse Rat. – Ei Frog, wo ois alli eint, – esch er öppe ned so starch, wie er meint?

Wow – das isch es Rieseding, – d Lilo Bur bechond 100 000 und e Ring. – Mer händ es bitzeli spioniert, – fürs nächsti Johr send mer nominiert.

Elektrisch fahrt de Gmeindrot Tuk-Tuk oder Töff, – jetzt wüssed mer, es isch alles en Blöff. – Will nämli d Wizol Solarstrom produziere, – tüend die gliche Lüt interveniere.

Fasnacht, Dorfkultur, Party hesch gseh – uf de neue Fasnachtsfahne vo de FDP. – Schinbar wot mers uf neue Felder versuche, – well mers für Politik nid cha bruche.