Beizenfasnacht: Auszüge von den Schnitzelbank-Gruppen (Teil 2)

Sie haben am Schmutzigen Donnerstag ihre ersten Kostproben gegeben und sind heute Dienstag erneut an der Beizenfasnacht anzutreffen. Die Schnitzelbank-Gruppen bereichern die närrische Zeit.

Von den Kammersängern bis zum Triangeli. Schnitzelbank-Gruppen geniessen in Wohlen eine grosse Tradition. «Am Schmutzigen Donnerstag waren alle Restaurants voll besetzt», blickt Ruedi Donat von den Kammersängern zurück.

Dies sei eine schöne Gegebenheit, «die wir Schnitzelbänkler zu schätzen wissen». Es habe ja auch schon andere Zeiten gegeben. Die Beizenfasnacht mit den diversen Schnitzelbank-Gruppen ist definitiv wieder einer der Höhepunkte der Wohler Fasnacht.

Kammersänger jammern über Hagewo bis zu Repol-Härri

Z’Wohle gohts nid nur politisch strub zue und här, all sind so kritisch, wo’s chlämmt, chasch hüür am Umzug g’seh. Schuelhüüser, Chindsgi, kei Chole me, da Kaff isch usser Rand und Band, nid nur a de Fasnacht es Wonderland.

Im Unterricht verzellids de Chind, wo mer s’Geld am enschte findt. Tüends jo nid im Chüelschrank versorge, ehr schtunid suscht am Jugendfäscht-Morge. Alles furt, s’het so müesse choo, zum Glück kei Schade, es zahlts d’Hagewo.

Die sind jo froh, chönts öppis zahle, mit neue Idee tüends gar ned prahle. Mer hoffid druf, da isch esoo 2050 … e Gwerb-Usstellig Hagewo.

Heisst ned Schmid, fod aa mit Breit. De bescht Läserbriefschrieber hed eine g’seid. En Iwohnerrot mit unändlecher Glatze, z’Istanbul streunid zähtuusig Chatze. Mit de Chatz uf sim Wahlplakat suecht er s’SVP- Diktat. Unverwüeschtlech, för i Gmeindrot z’alt, mer glaubid, de Maa esch dureknallt. Ganz erstuunt müend mer jetzt feststelle, als beschtg’wählte Ihwohnerrot händ en d’Wohler welle.

Gmeindamme isch er und Polizischt. Eine, wo au no im Grossrot escht. No alli Mätsch vom Alessandro go luege, s’Vogte Kasse sprängt alli Fuege. Au der Amme wott er im Näbenamt mache, mer erwartet, er miech ned nur halbi Sache.

De Umzug mit Tuusige vo Lüüt, es Riesespektakel. Für de Härri esch da nüd, de Fasnachtsumzog, de wird jetzt kürzt. Wägem Repol-Tschooli und sine Fürz.

D’Regierig seit, mer schnörrid ned dri, de Umzog isch jo eh schnell verbi. Mer Fasnächtler gutierid ned das Gebare und meinid, de Härri sett abfahre.

S Triangeli und der «WA»

In der Ausgabe vom vergangenen Freitag wurden bereits Verse vom Triangeli (Urs Senn) veröffentlicht. Nun bedanken wir uns als Zeitung bei ihm für die Aufmerksamkeit. Ehrensache.

De Dani Marti und de Chregi Hansen ligge sich selig i den Arm. Nach dem chalte Schreck wird beidne ändtli wieder richtig wohlig warm.

Mit sym Rückzug us em Gmeindrootsrönne tued sich e Traum erfülle: De Manfred Breitschmid wird ihne wyterhin de «WA» mit Lääserbriefe fülle.

De Arsi Perroud seid nach syner Abwahl, es gäb’ scho Optione. Und er heigi es paar Aagebot, wo sich würde lohne.

Nachdem ihm de Dani Marti im «WA» völlig ungeniert Änds Johr de grossi Schmuus brocht hed, wird jetzt natürlich spekuliert, öb der Arsi bim «WA» freie Mitarbeiter wird.

Öpper wott’ das aber hindertriibe: En andere Ex-Amme wott bim «WA» unbedingt Chef-Influänzer bliibe.

Us Protest gäg d’SRG-Halbierigsinitiative – do chunndt nid jede druuf – hört de Schnitzelbank i de Hälfti – das heisst scho nach zwee Ziile und vor de Pointe, uf.

Und sett’ jetzt öpper no de Räscht vom Bank mitsamt de Pointe welle, mer cha das alls – privat – für 15 Stutz über myni Homepage bstelle.

I ha Müeh gha, e Värs z’mache über de FIFA-Infantino, de piinlich, übli Gsell. Drum han i’s mit KI probiert und ha bi Chat-GPT e Vierziiler bstellt.

Es tuet mir leid, i cha de Värs, au wenn i möcht’, nid bringe: Das tolle Tool wott i de letzte Ziile immer «grandioses A…» underbringe.

Q-Gruppe widmet sich dem Recycling

Fläsche, Karton, alti Röhre, «bring’s» zum Römer zum Zerstöre. Sini neui Halle isch en tolle Ort. I de Zitig het de Römer Uskonft geh ond gseit, es stören, dass mer Wahlplakat ned au korrekt entsorgt.

Die Grüene würdid komposchtiert, d’SVP wird emigriert, de freii Märt seit i de FDP Adee. D’SP löst sich langsam uuf, d’Mitti schtiigt zu Christus uuf, mit de GLP weis niemer rächt wohe.

Mer hättet do no en Idee, wie’d eus vel Sorge chönntisch neh. Wenn’d met em Wahlplakat au grad no de Politiker chönntsch geh.

Mini-Pischu und die Nebengeräusche der Trump-Zölle

De Albtraum setzt sech wiiter fort, de Trump regiert ond macht, was er wot.
Er schockt d Schwiiz und die andere Länder mit höche Zöll, wer sell das ändere.

D’ Idee vom Trump wär ned so schlecht. För d’ Wohler Gmeindkasse chämt sie grad no rächt. Zöll itriebe chöntsch a mängem Ort, s’ gäbt viel Omsatz, mer gäbed euses Wort.

För jede, wo sin Goof id Schuel duet fahre, läck, do wörd de Zöllner strahle. Gäbs bi de Bremgarterstross en Durchfahrtszoll, chönntisch Schuelhüüser boue, die wäred wundervoll.

Z’ Wohle regiert aber ned de Trump, de Vogt weilt als Gemeindamme i dem Amt. Drom geds kei Zöll ond Kasse bliibed leer ond neue Schuelhüüser schiinend no so fern.

Hanagge nehmen Elterntaxis und die SVP unter die Lupe

Es isch irritierend, mer wänd doch s’bescht für eusi Chind. Es zeigt sich, dass die arme Chliine völlig überforderet sind.

Churzerhand verbüütet de Kanton ah allne Schuele s’Händy, ohni Navi findets de Wäg id Schuel nümm am Ändi. De Pappi oder s’Mami müehnd sie id Schuel chauffiere, will die chliine, dicke Sieche nonig vome E-Scooter profitiere.

Mir känned all die Schlagziile us de Ziitig vom KESD. Im Chrüzfüür zwüsche politischem Zwang und elterlichem Protest. Wenn sich weder Chind no Eltere löhnd la begleite, löhnd sich Politiker ebe allzu gschwind verleite.

Di Schuldige sind rasch gfunde, «z’wenig Schwiizer ide Klass». De Eidgenoss ide Real isch ebe en uussterbendi Rass.

Mer redet vo Teilnahme Tag und Nacht, und d’SVP seit au immer: «Mer hend öberall mitgmacht.» Doch bi de Schulraum-Kommission, o Schand, isch s’Namensschildli stets vakant.

Mer fragt sich drum mit fasnächtlichem Witz: Wie schaffed mer mit – ganz ohni Sitz?

«Zweiundvierzig Prozent Ussländer» – do süüfzt mer ganz schwer, die bringet nur Sorge, das wüssed mer sehr.

Jo es esch halt sone Sach met de ussländische Näme uf dene Einwohnerratliste. Ein Partei isch topplatziert, send dete die Beschte.

Doch bi der Wahlliste merkt mer ganz gschwind: Es chunt druf aa, öb Prozänt Angst mache – oder ob sie wählbar sind.

Füürspucker über Tresor, Baggersee und Steuerfuss

Fiire, jo das chömmer z’ Wohle, das goht im 28-gi au met weniger Chole. Kei Sorg, trotz kürztem 850-Johr-Kredit, d Füührwehrbeiz werd gliich en Hit!

Au met chlinem Buget seg euch gseit, vergässed zu spoter Stond ned d’ Sicherheit! För eusi Wohler Pädagoge jetzt nomol im Chor, en Chüelschrank esch halt
– wörkli kei Tresor!

S’letscht Johr hämmer gseid: Met Turismus – holt mer d’ Chole, leider chunt jetzt s’ Hive Air nümm uf Wohle.

Do hämmer überleit wie z’ Birsfälde – Buesse z’verteile, dass d’ Lüüt nümm dor d’ Näbeströssli eile. Denn s’ Umfahre vo euisem tägliche Stau, würd d’Kasse fülle wie die Sau!

Was hed die Inahmekommission för en Senn, i eusne Schnitzelbänk hed’s besseri Lösige denn!

Stüürchräftigi Lüüt setted mer locke, doch de Dorfchern haut si nonig – us de Socke. Z Wohle set mer öppis büüte, noii Sache boue wie di Sau. Es langet ned, es Gmeindshuus met Containerbau!

Zom Glöck gods bem Kino vorwärts, ded chonds langsam guet, das ged euis scho es bezeli meh Muet! Ond au am Räbberg, das händ er alli gsee, het’s als Attraktion noi en Baggersee!

Wohle esch es rächt tüürs Pflaster, so öppis brucht e huufe Zaster! All Johr wird ghofft, dass euise Stürfuess wird bliibe, eigentli wüsset mer – ganz genau, dass er muest it Höchi triibe.

De Gmeindrot meint, med 116 esch jetzt verbii, doch 120 Prozent zahle, das gsänd mer ned ii. 116, oder 120, wele seled mer jetzt näh? För eus chas do nor ein Kompromess gäh … --dm